IV Beynəlxalq Bakı Süd Vəzi Xərçəngi Konqresi

Sizi böyük məmnuniyyətlə Azərbaycan Respublikası Səhiyyə Nazirliyi, Azərbaycan Tibb Universiteti, Milli Onkologiya Mərkəzi, Azərbaycan Tibb Universitetinin Onkoloji Klinikası, Azərbaycan Süd Vəzi Xəstəlikləri Mütəxəssisləri Assosiasiyasının birgə təşkilatçılığı ilə keçiriləcək “IV Beynəlxalq Bakı Süd Vəzi Xərçəngi Konqresi”ndə iştirak etməyə dəvət edirik.

Konqresin məqsədi müxtəlif ölkələrin aparıcı mütəxəssisləri arasında əməkdaşlığı gücləndirmək, ən son diaqnostik və terapevtik prosedurların tətbiqini təşviq etmək, elmi tədqiqatların inkişafına təkan verməkdir. Tədbir, multidissiplinar yanaşmaları nəzərə alaraq, gələcək üçün optimal müalicə strategiyalarının müəyyənləşdirilməsinə, onkoloji xidmətlərin təkmilləşdirilməsinə və tibbi qayğının keyfiyyətinin artırılmasına xidmət edir.

Bu beynəlxalq tədbir yalnız elmi müzakirələr üçün deyil, həm də mədəniyyətlərarası dialoq və əməkdaşlıq üçün geniş imkanlar yaradacaq. Azərbaycan paytaxtı Bakı – qədim tarixi, zəngin mədəniyyəti, müasir memarlığı və unikal yerləşməsi ilə qonaqlarımıza həm elmi, həm də mədəni baxımdan yaddaqalan təcrübə qazandıracaq.

Konqresdə süd vəzi xəstəlikləri, süd vəzi xərçəngi və qadın reproduktiv sağlamlığı sahələrinə dair simpoziumlar, kurslar, workshoplar, canlı əməliyyatlar, e-poster sessiyaları, panel müzakirələr və sosial proqramlar təşkil olunacaq.

Əminik ki, gözəl Bakıda keçiriləcək bu konqres yalnız elmi biliklərin paylaşılması üçün deyil, həm də zəngin sosial proqramları, dostluq və əməkdaşlıq mühiti ilə hər bir iştirakçı üçün unudulmaz təcrübə olacaqdır.

Sizi bu möhtəşəm tədbirin bir hissəsi olmağa dəvət edir və birlikdə həm elmi, həm də mədəni baxımdan yaddaqalan günlər keçirməyi arzulayırıq.

Hörmətlə,
Kongresin təşkilat komitəsinin sədri Nigar Mehdiyeva
Kongresin elmi komitəsinin sədri Həqiqət Vəliyeva